Vladimir Putin ka frikë se mund të 'varet' nëse dështon në luftën në Ukrainë dhe po planifikon të përshkallëzojë konfliktin, ka pohuar një burim i brendshëm. Persona nga brenda Kremlinit pohojnë se Putin ka zgjedhur të përshkallëzojë luftën, nga frika se mund të përballet me reagime negative nga publiku rus nëse i jep fund konfliktit pa qenë në gjendje të pretendojë fitore. Në një fjalim më 22 gusht, Putin akuzoi Ukrainën se po hapte 'kutinë e Pandorës' dhe kërcënoi me 'sulme mbi sektorët më të ndjeshëm të ekonomisë së saj'. Më herët atë ditë, duke folur për Rusinë e Bashkuar, partinë në pushtet në Rusi, ai hodhi poshtë sugjerimet se luftës po i vinte fundi. 'Operacioni ushtarak special vazhdon', tha ai. 'Ne do të ecim vetëm përpara'. Kjo vjen në një kohë kur rusët e zakonshëm po e ndjejnë gjithnjë e më shumë barrën e luftës, duke u përballur me sulme të pamëshirshme me dronë ukrainasë, kufizime në internet dhe një ekonomi në vështirësi. Sipas The Economist, pakënaqësia është edhe më e madhe mes elitave të Rusisë, me një person të brendshëm që pretendon se ata janë gjithnjë e më të frustruar nga kohëzgjatja e konfliktit. Putin thuhet se beson se mund të jetë në rrezik nëse i jep fund luftës pa arritur të paktën qëllimin e tij minimal për të kapur të gjithë rajonin e Donbasit. "Do të më varin", raportohet se ka thënë ai, sipas një burimi të brendshëm të cituar nga The Economist.