Ka përfunduar takimi mes presidentëve Joe Biden dhe Vladimir Putin që zgjati më shumë se 3 orë e gjysmë. Takimi mes tyre u zhvillua në Gjenevë, teksa mediat e huaja shkruajnë se presidenti Biden u largua nga Villa La Grange, ku u mbajt takimi mes dy liderëve. Presidenti rus Vladimir Putin tha pas takimit, se Moska dhe Uashingtoni ranë dakord që ambasadorët e tyre të kthehen në detyrë. "Ata do të kthehen në vendin e tyre të punës. Kur saktësisht është thjesht një ceshtje teknike," u tha Putin gazetarëve. “Nuk ka patur armiqësi por kemi diferencë pozicionesh,” shtoi ai. Marrëdhëniet diplomatike midis Moskës dhe Uashingtonit pësuan krisje që kur Biden mori detyrën. Pasi Biden e krahasoi Putinin me një "vrasës", Rusia në mars ndërmori një hap të rrallë duke tërhequr ambasadorin e saj Anatoly Antonov dhe tha se i dërguari i SHBA John Sullivan në Moskë gjithashtu duhet të kthehej në Uashington. Sullivan u largua nga Moska në Prill, ndërsa të dy vendet njoftuan një valë sanksionesh të mëdha dhe dëbime të diplomatëve. Në maj, Rusia i shpalli zyrtarisht Shtetet e Bashkuara si shtet "jo miqësor", duke e ndaluar ambasadën amerikane të punësojë shtetas rusë. I vetmi vend tjetër në atë listë është Republika Çeke. Ishte Joe Biden ai që e kërkoi takimin e sotëm me Vladimir Putinin, dhe lëvizja e parë dukej se i takote pikërisht presidentit amerikan. Dy liderët e zhvilluan takimin të shoqëruar nga Ministri i Jashtëm rus, Sergei Lavrov dhe sekretari i Shtetit Anthony Blinken.