Vladimir Putini thuhet se po përgatitet për një sulm hakmarrës pasi Kievi dëmtoi rreth 40 avionë rusë në një goditje poshtëruese. Vetëm disa orë pas sulmit të guximshëm me dronë të Kievit, Moska nisi, një valë sulmesh hakmarrëse gjatë natës. Sulmet vdekjeprurëse vranë pesë persona në Zaporizhzhia, plagosën gjashtë në Sumy dhe disa të tjerë në rajonin verilindor të Harkivit, sipas autoriteteve ukrainase. Kjo vjen ndërsa delegacionet ruse dhe ukrainase takohen në Stamboll për një raund të dytë bisedimesh për paqe. Propagandistët rusë dhe mediat kombëtare tani po argumentojnë pse duhet një përgjigje taktike bërthamore ndaj Operacionit Rrjeta e Merimangës të Ukrainës. Disa madje po bëjnë thirrje për përdorimin e raketave shkatërruese ruse Oreshnik. Ukraina pretendon se ka shkatërruar të paktën 13 avionë në katër baza ajrore të ndryshme ruse. Rreth 40 avionë u dëmtuan gjithsej. Pas humbjeve të rënda, radioja e kobshme e Rusisë që njihet edhe si radioja e apokalipsit, shpërtheu në aktivitet, duke transmetuar fjalë të koduara. I njohur për përdorimin nga KGB-ja gjatë kulmit të Luftës së Ftohtë, stacioni radiofonik UVB-76 ka gumëzhitur që nga fundi i viteve '70 për të shkëmbyer gjoja mesazhe sekrete ushtarake. Por aktiviteti i tij rritet pas ngjarjeve të mëdha ushtarake ose politike. Ndërsa nuk dihet se çfarë tregojnë këto sinjale të çuditshme, spekulimet janë se ato janë të lidhura me operacione të fshehta ushtarake ose me protokolle bërthamore. UVB-76 transmeton në frekuencën 4625 kHz dhe karakterizohet nga një tingull i çuditshëm që gumëzhin 24 orë në ditë, shtatë ditë në javë. Ai ka qenë aktiv këtë vit më parë pas telefonatave të Putinit me Donald Trump.