Yevgeny Prigozhin, shef i mercenarëve rusë të grupit Vagner, tha se ishte përjashtuar nga të gjitha kanalet qeveritare ruse të komunikimit. Në një mesazh të postuar në kanalin e tij në Telegram, Prigozhin pretendoi se ai ishte bllokuar nga kremlini për shkak të apeleve publike të tij që trupat e Vagnerit të furnizoheshin me më shumë municione. Grupi Vagner u shfaq si një faktor i rëndësishëm në luftën në Ukrainë në muajt e fundit të 2022 dhe Prigozhin u shfaq shpesh në lajme për shkak të taktikave të tij brutale dhe rekrutimit të të burgosurve nga burgjet. Për momentin Vagner thuhet se është përfshirë në betejën e egër për qytetin ukrainas të Bakhmutit, që vazhdon prej muajsh. Prigozhin në javët e fundit ka bërë shumë apele publike për ushtrinë zyrtare ruse që të furnizojë njerëzit e tij me më shumë municione, e në këtë mënyrë, ata të vazhdojnë sulmin në Bakhmut.