Vladimir Putin mund të ndalojë sulmet me raketa dhe dronë të Rusisë ndaj Ukrainës për të bindur Donald Trumpin të tërhiqet nga kërcënimi i tij për të vendosur sanksione. Mundësia po shqyrtohet ndërsa Putin u takua me Steve Ëitkoff, të dërguarin e presidentit amerikan, në Moskë të mërkurën për bisedime mbi përfundimin e luftës. Ndërsa presidenti rus deri më tani ka refuzuar një armëpushim të plotë, mendohet se kjo ofertë mund të qetësojë SHBA-në dhe të bëjë që Moska të shmangë sanksionet ekonomike shkatërruese me të cilat kërcënon Uashingtoni. Trump tha se do të marrë një "vendim" mbi tarifat kundër Rusisë dhe partnerëve të saj ndërkombëtarë të tregtisë së naftës pas diskutimeve të ditës së sotme. Zyrtarët rusë besojnë se mbërritja e Ëitkoff në kryeqytetin rus do t'i japë Putinit një mundësi për të rinisur bisedimet me SHBA-në dhe për të shmangur kërcënimet me sanksione, thanë burime anonime, të cituara nga Bloomberg. Kjo mund të fillojë me një ofertë për një “armëpushim ajror” si një gjest shtensionimi, për sa kohë që Ukraina gjithashtu e nënshkruan propozimin, shtoi raporti. “Ne i konsiderojmë takime të tilla si shumë të rëndësishme, por nuk bëjmë komente paraprake për to”, tha Dmitry Peskov, zëdhënësi i Kremlinit, përpara bisedimeve. Trump po kërcënon të vendosë tarifa të larta për vendet që blejnë lëndë djegëse fosile ruse në një përpjekje për të rritur presionin mbi Kremlinin për të ndaluar pushtimin e tij. Ai i dha 10 ditë kohë Moskës për të pranuar një marrëveshje armëpushimi dhe ultimatumi skadon të premten.