Rusia nisi një valë të re sulmesh me dronë në mëngjesin e të martës në Ukrainën jugore, duke dëmtuar infrastrukturën në portin e Detit të Zi, Odesa, pasi Moska tha se zmbrapsi një sulm ukrainas me dronë në rajonin e aneksuar të Krimesë. Serhiy Bratchuk, një zëdhënës i administratës ushtarake të rajonit të Odesës, tha se mbrojtja ajrore e Ukrainës zmbrapsi një sulm ajror rus në këtë qytet. Ukraina tha më vonë në një deklaratë se "mbetjet nga raketat e shkatërruara dhe vala e shpërthimit nga rrëzimi dëmtuan objektet e infrastrukturës së portit". Sulmet në Odesa, qytet vendimtar për eksportet e grurit të Ukrainës, erdhi një ditë pasi Moska u tërhoq nga marrëveshja e ndërmjetësuar nga OKB-ja për të lejuar eksportin e sigrut të drithërave, duke refuzuar ta zgjasë marrëveshjen pasi ajo skadoi më 17 korrik. Rusia gjatë natës gjithashtu nisi një sulm në rajonin e Mikolaiv, duke përdorur dronë të prodhuar nga Irani që shkaktuan një zjarr, tha në Telegram guvernatori rajonal Vitaliy Kim."Po shuajmë zjarrin. Nuk ka viktima", ka shkruar ai. Kryebashkiaku i qytetit të Mikolaivit, Oleksandr Sienkovych, tha se zjarri shpërtheu në një nga objektet e qytetit dhe se ishte "mjaft serioz".