Vladimir Putin është i hapur për të diskutuar një marrëveshje armëpushimi në Ukrainë me Donald Trump, por përjashton mundësinë e bërjes së ndonjë lëshimi të madh territorial dhe këmbëngul që Kievi të braktisë ambiciet për t'u bashkuar me NATO-n, i thanë agjencisë së lajmeve Reuters pesë burime të njohura me opinionin e Kremlinit. Presidenti i sapozgjedhur i SHBA-së, Donald Trump, i cili është zotuar se do t'i japë fund konfliktit me shpejtësi, kthehet në Shtëpinë e Bardhë në një kohë të epërsisë ruse në Ukrainë. Moska kontrollon një pjesë të vendit që në përmasa është sa shteti amerikan i Virxhinias dhe po përparon me ritmin më të shpejtë që nga ditët e para të pushtimit të vitit 2022. Në raportimin e parë të detajuar të asaj që Presidenti Putin do të pranonte në çdo marrëveshje të ndërmjetësuar nga Trump, pesë zyrtarët aktualë dhe ish-zyrtarë rusë thanë se Kremlini mund të pajtohej gjerësisht për të ngrirë konfliktin përgjatë vijës aktuale të frontit. Mund të ketë vend për negociata mbi ndarjen e saktë të katër rajoneve lindore të Donetskut, Luhanskut, Zaporizhzhias dhe Khersonit, sipas tre prej njerëzve që të gjithë kërkuan anonimitetin për të diskutuar çështje të ndjeshme. Rusia gjithashtu mund të jetë e hapur për t'u tërhequr nga pjesët relativisht të vogla të territorit që mban në rajonet e Kharkivit dhe Mykolaivit, në veri dhe jug të Ukrainës, thanë dy nga zyrtarët. Putin tha këtë muaj se çdo marrëveshje armëpushimi duhet të pasqyrojë "realitetet" në terren, por ai shtoi se kishte frikë nga një armëpushim jetëshkurtër që do t'i lejonte Perëndimit të riarmatoste Ukrainën.