Kremlini tha të mërkurën se presidenti Vladimir Putin kishte emëruar Alexei Dyumin, një ndihmës dhe ish truprojë të tij, si sekretar të Këshillit të Shtetit, një organ këshillimor për kreun e shtetit rus. Pasi u rizgjodh për një mandat tjetër gjashtëvjeçar në fillim të këtij viti, Putin e bëri Dyumin një ndihmës të specializuar në industrinë e mbrojtjes dhe Kremlini tha se do të kishte edhe përgjegjësi të tjera për të. Një dekret i nënshkruar nga Putin për emërimin e tij në postin e Këshillit të Shtetit u publikua në faqen e internetit të Kremlinit të mërkurën në mëngjes. Sergei Markov, një ish-këshilltar i Kremlinit, tha në fillim të këtij muaji se shumë njerëz besonin se Putin e shihte Dyumin si pasardhësin e tij. Putin, 71 vjeç, sapo ka filluar një mandat të ri gjashtëvjeçar dhe pritet të drejtojë vendin në vitet në vijim ndërkohë që nuk ka asnjë informacion të besueshëm se kë mund të favorizojë ai, që një ditë ta zëvendësojë. Por emri i Dyumin, ndër të tjerë, ka qenë prej kohësh objekt spekulimesh mes elitës politike të Moskës. Dyumin, 51 vjeç, u soll në Kremlin në fillim të këtij muaji pasi shërbeu si guvernator rajonal i rajonit Tula të Rusisë. Dyumin hyri në Shërbimin Federal të Gardës së Rusisë, që merret me sigurinë e elitës së Kremlinit, në vitin 1995 dhe ruajti vetë Putinin gjatë mandatit të tij të parë dhe të dytë. Ai gjithashtu ka punuar si nënkryetar i GRU-së, inteligjencës ushtarake ruse.