Presidenti turk, Recep Tayyip Erdogan mendon se Vladimir Putin do t’i japë fund luftës në Ukrainë. Në një intervistë për televizionin amerikan PBS, Erdogan thotë se ka si objektiv arritjen e paqes dhe madje edhe presidenti i Rusisë e do këtë. “Në Uzbekistan, u takova me presidentin Putin dhe diskutuam gjerë e gjatë me të. Ai më tregoi se është i gatshëm ti japë fund kësaj situate sa më parë që të jetë e mundur. Kjo ishte përshtypja ime sepse mënyra në të cilën po zhvillohen gjërat tani, është pak problematike. 200 pengje do të këmbehen pas një marrëveshjeje mes palësh. Mendoj se do të hidhet një hap domethënës përpara”. Por, Erdogan thotë edhe se tokat e pushtuara nga Moska duhet ti rikthehen Kievit: “Nëse në Ukrainë do të vendoset paqja, sigurisht, rikthimi i tokave që janë pushtuar do të jetë shumë i rëndësishëm. Putin i ka hedhur disa hapa. Ne kemi hedhur disa hapa. Territoret e pushtuara duhet t’i kthehen Ukrainës”, ka thënë Erdogan duke shtuar se Moska duhet t’ia kthejë “edhe Krimenë pronarëve të ligjshëm”. “Kemi që nga 2014 që flasim me mikun tim të ngushtë Putin dhe kjo është ajo që ne i kemi kërkuar...kthimin e Krimesë. Për fat të keq nuk është hedhur asnjë hap përpara në këtë drejtim”.