Ndërkohë që në Riad kanë nisur bisedimet e para mes shba-së dhe rusisë për të gjetur një zgjidhje për luftën në Ukrainë, Kremlini tha se presidenti Vladimir Putin është i përgatitur për të biseduar me presidentin ukrainas, Volodymyr Zelensky, “nëse do të jetë e nevojshme”. “Vetë Putin ka thënë se është i gatshëm të negociojë me Zelenskin, nëse është e nevojshme”, tha zëdhënësi i Kremlinit, Dmitry Peskov para gazetarëve mëngjesin e të martës. “Megjithatë, duhet diskutuar baza ligjore e marrëveshjeve, duke marrë parasysh që legjitimiteti i Zelenskyt mund të vihet në pikëpyetje”, shtoi ai. Peskov ka thënë po ashtu se Rusia nuk është kundër anëtarësimit të Ukrainës në Bashkimin Evropian, për aq kohë sa nuk përbën kërcënim për sigurinë. “Kjo është e drejtë sovrane e secilit shtet. Po flasim për integrim dhe procese ekonomike, dhe në këtë pikë, natyrisht, askush nuk mund të diktojë diçka për një shtet tjetër. Ne nuk do ta bëjmë këtë. Por, qëndrimi ynë në çështjet e sigurisë, aleancat ushtarake, është krejt tjetër. Ajo është temë tjetër dhe të gjithë e dinë këtë”, tha Peskov. Më herët, presidenti rus Vladimir Putin ka deklaruar se është i gatshëm të ulet në bisedime për ukrainën por jo me presidentin ukrainas Volodimir Zelenski, që sipas tij nuk ka legjitimitet. Kjo pasi mandati i zelenskit ka mbaruar tashmë prej kohësh, por ligji i luftës i shpallur prej tij ndalon mbajtjen e zgjedhjeve në Ukrainë në kohë konflikti ushtarak.