Ministrja e Jashtme e Gjermanisë, Annalena Baerbock, tha se presidenti i Rusisë, Vladimir Putin, do të japë llogari për luftën në Ukrainë dhe për pasojat globale që ka shkaktuar ajo. “Nëse Putini mendon se pas dy vjetëve bota do të harrojë se kush është përgjegjës për luftën në Ukrainë dhe pasojat e saj globale, e ka shumë gabim”, tha Baerbock të martën para se të nisej për takimin e ministrave të Jashtëm të G20-ës në Brazil. “Ne nuk do të heqim dorë nga parimet themelore të Kombeve të Bashkuara dhe do ta mbështesim fuqishëm Ukrainën, për sa kohë që të jetë e nevojshme dhe derisa populli i saj të mund të jetojë në paqe dhe në liri përsëri”, shtoi ajo. Pushtimi rus i Ukrainës po mbush tani plot dy vjet. Ukraina, lufta në Rripin e Gazës dhe kërcënimi i zgjerimit të konfliktit në Lindjen e Mesme pritet të jenë temat kryesore të diskutimit gjatë takimit të G20-ës. Ministri i Jashtëm i Rusisë, Sergei Lavrov, pritet të marrë pjesë në takimin që mbahet në Rio de Zhaniero. “Me humanizmin dhe përkushtimin tonë ndaj ligjit ndërkombëtar, ne luftojmë kundër mizorisë së aktorëve, siç është Qeveria ruse”, theksoi Baerbock.