Presidenti amerikan, Donald Trump, i ka dërguar një paralajmërim të qartë Kremlinit, javën e kaluar, duke e njoftuar për planet për dërgimin e armëve në Ukrainë përmes Evropës e duke thënë se Shtetet e Bashkuara do të vendosin “tarifa shumë të rënda” ndaj Rusisë nëse nuk arrin një marrëveshje për ndalimin e luftës brenda 50 ditësh. Trump nuk ka specifikuar nëse do të arrihet një armëpushim apo vetëm një marrëveshje gjithëpërfshirëse paqeje. Sidoqoftë, shumë analistë thonë se kjo ka pak gjasa të ndodhë. Faktor kryesor janë qëllimet e presidentit rus, Vladimir Putin, që qartësisht shkojnë përtej pushtimit të një pjese të Ukrainës. Ai e ka bërë të qartë se synon të nënshtrojë vendin dhe të dobësojë NATO-n dhe Perëndimin, duke kërkuar që të rikthejë një pjesë të ndikimit që Moska kishte gjatë epokës sovjetike mbi një pjesë të Evropës. Por, synimet më afatshkurtra lidhem drejtpërdrejt me territorin. Rusia aktualisht kontrollon pothuajse 20 për qind të territorit të Ukrainës. Përveç Gadishullit të Krimesë, që Rusia e ka nën kontroll që nga viti 2014, Putini pretendon se rajonet ukrainase si Donjecku, Luhansku, Zaporizhja dhe Hersoni janë tashmë pjesë e Rusisë, përfshirë edhe zona të mëdha që Rusia ende nuk i ka pushtuar. Rusia ka thënë se tërheqja e plotë e Ukrainës nga këto katër rajone është parakusht për çdo marrëveshje paqeje, një kërkesë që Kievi thotë se është e papranueshme. E ndërkohë, 50 ditët kohë që ka dhënë Trumpi, dalin dhe teprojnë që kremlini të bëjë kërdinë në Ukrainë. Rusia qartazi po intensifikon ofensivën e saj ndërsa zyrtarë perëndimorë kanë paralajmëruar se shumë shpejt mund të shohim deri në 2 mijë dronë sulmi mbi ukrainë, në të njëjtën kohë.