Të gjithë prisnin që kundërofensiva e Ukrainës kundër pozicioneve ruse të ishte e ashpër dhe e suksesshme, por nuk ndodhi kështu. Pas më shumë se dy muajsh lufte në një vijë të gjatë fronti që shtrihet nga lindja e vendit në jug, forcat e Kievit nuk kanë arritur ende ndonjë përparim të madh. Tani Rusia duket se po riorganizohet, pas një sërë sulmesh me dronë në Moskë, që duhet se kanë ngritur alarmin në ushtrinë e Vladimir Putin. Qendra Kombëtare për Rezistencën e Ukrainës, njoftoi së fundmi se Moska ka hartuar një "plan" për Mariupolin e pushtuar dhe se planifikon të sjellë rreth 300,000 rusë atje, siç shkruan “Kyiv Independent”. Moska dyshohet se planifikon t'i sjellë këta njerëz në Mariupol deri në vitin 2035. Të paktën kështu thuhet në dokumentet e përpiluara nga regjimi që drejton aktualisht qytetin. Në raportin e nënoficerëve thuhet se Kremlini ka krijuar një program hipotekash më të lira në pjesët e kontrolluara nga Rusia të Ukrainës.