Presidenti rus Vladimir Putin ka përforcuar Gardën e tij Kombëtare me njësinë e tij elitare të forcave speciale, si edhe me tanke, avionë luftarakë dhe artileri për të mbrojtur veten nga një rebelim tjetër. Presidenti rus urdhëroi personalisht njësinë e forcave speciale Grom të Ministrisë së Brendshme, që të zhvendoset nën komandën e Gardës Kombëtare, sipas Alexander Khinshtein, një deputet i partisë “Rusia e Bashkuar” e Putinit. “Me vendim të presidentit, njësia Grom po i kalon në kontrollin Gardës Kombëtare Ruse së bashku me stafin dhe të gjithë infrastrukturën”, tha ai. Grom, ka një reputacion për operacione të ashpra për kapjen e liderëve të bandave dhe ka rreth 7,000 trupa. Putini krijoi Gardën Kombëtare në vitin 2016 dhe urdhëroi që t’i raportonte direkt atij, dhe jo ministrisë së Mbrojtjes, duke bërë që analistët ta përshkruanin atë si “Gardën e tij Pretoriane”. Garda drejtohet nga ish-truproja e tij, Viktor Zolotov, dhe ka 320,000 trupa, që më parë shiheshin si një ndërthurje mes policisë së armatosur dhe njësive të milicisë, roli kryesor i të cilëve ishte shtypja e zërave kritikë ndaj Kremlinit. Megjithatë, që nga rebelimi i liderit të mercenarëve të Ëagnerit, Yevgeny Prigozhin, muajin e kaluar, Putin ka ndryshuar mendim dhe ai tani thuhet se është i shqetësuar për besnikërinë e shërbimeve të tij të sigurisë dhe oficerëve ushtarakë.