Të paktën 45.123 ushtarë rusë janë vrarë që kur Moska nisi pushtimin e Ukrainës dy vjet më parë, tregon një hulumtimi nga Mediazona dhe Shërbimi rus i BBC-së, që kanë identifikuar ushtarët e vdekur. Dy e treta e të gjithë të vrarëve të konfirmuar, vullnetarë, rekrutë, ish të burgosur dhe luftëtarë nga kompanitë ushtarake private, nuk kishin lidhje me ushtrinë para se të niste pushtimi, thotë hulumtimi. Këtu përfshihen 5.406 ushtarë të mobilizuar, 80 për qind e të cilëve u vranë në vitin e dytë të luftës. Krasnodari, Sverdolvsku, Bashkortostani dhe Çelabinsku janë rajonet me numrin më të madh të të vdekurve. Gazetarët kanë identifikuar 27.906 ushtarë rusë të vrarë vitin e kaluar, 57 për qind më shumë se humbjet e konfirmuara në vitin e parë të pushtimit. Nga tetori i vitit të kaluar deri këtë muaj, kryesisht në periudhën gjatë të cilës forcat ruse u futën në qytetin industrial të Avdiivkës dhe në zonat përreth në rajonin e Donjeckut, hulumtuesit kanë konfirmuar vdekjen e 6.614 ushtarëve rusë. Avdiivka ra javën e kaluar.