Kryeministrja italiane Giorgia Meloni zhvilloi një takim zyrtar me presidentin francez Emmanuel Macron, ku ky i fund u shfaq mjaft dashamirës ndaj saj, duke e përqafuar, afrimitet i cili u duk se e kapi në befasi Melonin. Pamjet tregojnë një moment të qartë hezitimi gjatë përqafimit, duke bërë që sikleti i kryeministres italiane të lexohet qartë, ndërsa videoja u përhap me shpejtësi në rrjete sociale. Ky moment vjen pas përplasjeve në distancë mes dyshes, pasi në muajin shkurt, Emmanuel Macron paralajmëroi Giorgia Melonin të mos përzihet në punët e brendshme të Francës, pasi kryeministrja italiane dënoi vrasjen e një aktivisti të krahut të djathtë në Lyon. Vrasja nxiti tensione politike në Francë para zgjedhjeve komunale në mars dhe garës presidenciale të vitit 2027, në të cilën partia e ekstremit të djathtë Tubimi Kombëtar konsiderohej favorite. Ndaj, Meloni, një nacionaliste e krahut të djathtë, tha se vrasja ishte "një plagë për të gjithë Evropën" dhe u ankua për një "klimë urrejtjeje ideologjike". Asokohe, Macron u kundërpërgjigj, duke thënë: "Le të qëndrojë secili në vendin e vet”. Por, me sa duket ky episod është hedhur pas krahëve nga lideri francez.