Vizita e fundit e një presidenti francez në Gjermani ka qenë në vitin 2000, nga Zhak Shirak. Një kohë e gjatë për dy vende që ndihen të lidhura aq ngushtë. Por kjo pauzë e gjatë nuk ka asnjë domethënie politike. Krerët e qeverive dhe ministrat e të dy vendeve takohen rregullisht një herë në disa muaj. Gjatë një vizite shtetërore në plan të parë nuk është politika, por takimi me vendin dhe njerëzit e tij. Pritës nuk është kancelari, por presidenti gjerman. Përveç Berlinit stacione të vizitës të çiftit presidencial do të jenë edhe Dresdeni dhe Münsteri, ku Macron do të nderohet me Çmimin Ndërkombëtar të Paqes së Vestfalisë. Në fakt vizita e Emmanuel dhe Brigitte Macron në Gjermani ishte planifikuar për korrikun e kaluar, por presidenti e anuloi atë për shkak të trazirave në Francë. As tani gjërat nuk janë shumë më të qeta për Macronin. E ndërkohë, duket se të dyja vendet janë më larg se kurrë. Macron paralajmëroi pak kohë më parë se Evropa mund të vdesë. Ai kërkon më shumë sovranitet dhe mbrojtje të përbashkët për Europën. Olaf Scholz i vlerësoi "impulset pozitive" të fjalimit të Macron për Evropën, por nuk dha një përgjigje konkrete. Analistët flasin për mentalitete të ndryshëm. Ka edhe dallime të tjera. Parisi është për përdorimin e energjisë bërthamore, Berlini i ka mbyllur edhe reaktorët e fundit, megjithë mungesën e energisë. Macroni nuk përjashton mundësinë e dërgimit të trupave në Ukrainë, Scholz e refuzon këtë kategorikisht. Planet për një tank gjermano-francez dhe një avionin ushtarak po përparojnë shumë ngadalë. Macron dëshiron që Gjermania për planet e saj të armatimit, të bëjë porosi te firmat evropiane, pse jo edhe ata franceze, Gjermania preferon të blejë te amerikanët. Sidoqoftë, Scholz dhe Macron, po tentojnë të tregojnë se e kuptojnë njëri tjetrin. Në një video të shkurtër ata e provojnë këtë edhe në gjuhën e njëri-tjetrit. Macron lexon një pyetje në platformën X, në vend të Macronit përgjigjet Scholz - në frëngjisht. E në fund, Macron falenderon në gjermanisht. Mes vetë francezëve dhe gjermanëve, situata është ndryshe. Sondazhet tregojnë se më shumë se 80 për qind e banorëve respektivë, e konsiderojnë vendin fqinj një partner të besueshëm.