Presidenti i Rusisë, Vladimir Putin duket se nuk po i shkon siç duhet plani për pushtimin e Ukrainës. Sipas mediave ndërkombëtare, deri tani ushtria ruse ka humbur mbi 3500 ushtarë, 14 avionë, 8 helikopterë, 102 tanke, 536 mjete të blinduara dhe një sistem anti-ajror BUK. Mëngjesin e kësaj të shtune Rusia ka nisur drejt Ukrainës armë edhe më të rrezikshme dhe shkatërrimtare për armikun. Gazetari i CNN, Frederik Pleitgen raporton se rusët po dërgojnë në Ukrainë sistemin flakëhedhës TOS-1, të cilët lëshojnë predha termobarike. Sipas tij, këto armatime të rënda po shkojnë në Kharkiv. Sistemi raketor TOS-1 është i prodhuar që në kohën e Bashkimit Sovjetik dhe është përdorur për herë të parë në luftën në Afganistan në fund të viteve 1980, ndërsa së fundmi është përdorur në Siri. Testimet e këtyre raketave u kryen së fundmi në Bjellorusi, gjatë stërvitjes së përbashkët të dy ushtrive. Ky sistem është vendosur mbi shasi tanku dhe është i projektuar për të goditur fortifikimet e kundërshtarit. Në vitin 2015, OSBE raportoi se kjo armë është parë të përdoret nga rebelët në lindje të Ukrainës. Në drejtim të Ukrainës tashmë janë nisur dhe njësitë e mortajave të rënda “2S4 Tyulpan 240mm”, të cilat njihen edhe si “shkatërruesit e qyteteve” për shkak të fuqisë së madhe të shpërthimit të predhave që hedhin. Mëngjesin e sotëm rusët kanë bërë rotacion të forcave të tyre në Ukrainë, për të vijuar operacionin ushtarak. Sulmi i ushtrisë ruse ndaj Ukrainës ka filluar që prej orëve të para të së enjtes me sulme masive ajrore dhe raketor dhe më pas edhe nga toka.