Ministri izraelit i Mbrojtjes, Yoav Gallant, u tha trupave të mbledhura në kufirin me Gazën se ata së shpejti do ta shihnin "nga brenda" enklavën palestineze, duke sugjeruar se një pushtim i pritshëm tokësor me qëllim eleminimin e Hamasit mund të nisë së shpejti. Izraeli ndërmori sulme ajrore ndaj Gazës të enjten, ndërsa vazhdon aksionin për asgjesimin e Hamasit pas sulmit mizor të militantëve të armatosur që vranë 1400 izraelitë. Izraeli e ka rrethuar Rripin e Gazës me një popullsi prej 2.3 milionë banorësh. Sulmet ajrore izraelite ndaj enklavës raportohet se kanë shkaktuar mijëra të vdekur dhe kanë lënë më shumë se një milionë banorë të pastrehë. Në veri të Gazës, pamjet e siguruara nga agjencia e lajmeve Reuters nga kampi i refugjatëve Jabaliya, tregojnë banorët duke gërmuar me duar nën një ndërtesë të dëmtuar për të nxjerrë një djalë dhe një vajzë të vogël të bllokuar nën rrënoja. “Tani e shihni Gazën nga larg, së shpejti do ta shihni nga brenda. Urdhëri do të vijë”, u tha Gallant ushtarëve. Menjëherë pas deklaratës së Gallant, kryeministri izraelit Benjamin Netanyahu publikoi një video të tij me trupat pranë kufirit duke premtuar fitore.