Belgjika është bërë vendi i parë në botë që me ligj, i garanton punonjëseve të seksit, lejen e lindjes të paguar nga punëdhënësi, si edhe pensionin. Sipas këtij ligji të ri, punonjësit e seksit do të kenë tani të drejtën e kontratave zyrtare të punës, sigurimit shëndetësor, pensioneve, lejes së lindjes dhe raportit shëndetësor. Në thelb, ai që njihet si profesioni më i vjetër në botë do të trajtohet si çdo punë tjetër. Ka me dhjetëra e miliona punonjëse seksi në mbarë botën. Puna është dekriminalizuar në Belgjikë në vitin 2022 dhe është e ligjshme në disa vende të tjera, duke përfshirë Gjermaninë, Greqinë, Holandën dhe Turqinë. Por vendosja e të drejtave dhe kontratave të punësimit sipas modelit belg, është e një risi në botë. "Ky është një hap radikal dhe lëvizja më e mirë që kemi parë në botë, deri më tani", thotë Erin Kilbride, një studiuese në Human Rights Ëatch. "Ne kemi nevojë që çdo vend të lëvizë në këtë drejtim", shton ajo. Kritikët në anën tjetër thonë se aktiviteti shkakton trafikim, shfrytëzim dhe abuzim, cka ky ligj nuk do t'i parandalojë. "Është e rrezikshme sepse normalizon një profesion që është gjithmonë i dhunshëm në thelbin e tij," thotë Julia Crumière, një vullnetare nga Isala, një OJQ që ndihmon punonjëset e seksit të rrugës, në Belgjikë. Ndërkohë, tutorët që kontrollojnë punën e seksit do të lejohen të operojnë ligjërisht sipas ligjit të ri, me kusht që të ndjekin rregulla strikte. Kushdo që është dënuar për një krim të rëndë nuk do të lejohet të merret me këtë aktivitet.