Zbardhja e vendimit të Gjykatës së Lartë për konfliktin mes aksionerëve të Aeroportit të Vlorës pritet që të rikthejë punën në kantier, e bllokuar prej disa javësh dhe e shoqëruar me tensione mes përfaqësuesve dhe punonjësve të kompanisë MABCO me përfaqësuesit dhe punonjësit e kompanisë 2A Grup. Vendimi i shkallës më të lartë të gjyqësorit i rikthen MABCO-s të drejtat e administrimit në shoqërinë koncesionare, duke rrëzuar vendimet e mëparshme të dy shkallëve të gjykimit. Përplasja mes MABCO-s dhe kompanisë 2A Group krijoi për disa ditë një situatë të tensionuar në hyrjet e kantierit, ku u bllokua hyrja e punonjësve dhe mjeteve të nënkontraktorëve, duke sjellë ndërprerje të punimeve dhe vonesa në zbatimin e projektit. Me zbardhjen e vendimit të Gjykatës së Lartë, pritet që puna në kantier të rifillojë normalisht. Megjithatë, mbetet për t’u parë nëse rikthimi i MABCO-s do t’i japë fund përfundimisht konfliktit mes palëve dhe do të mundësojë përshpejtimin e punimeve në një nga projektet më të rëndësishme infrastrukturore të vendit, me synimin që Aeroporti i Vlorës të përfundojë brenda afateve të parashikuara.