Punë pa kontratë, paga jashtë listave dhe marrëdhënie që ekzistojnë vetëm në praktikë vijojnë të mbajnë aktive ekonominë informale në tregun e punës në Shqipëri. Pavarësisht rritjes së kontrolleve dhe presionit institucional, “puna e zezë” mbetet e përhapur, veçanërisht në sektorë me risk të lartë. Gjatë vitit 2025 janë inspektuar mbi 205 mijë vende pune në më shumë se 9 mijë subjekte, një rritje me 8% krahasuar me një vit më parë. Paralelisht, është rritur edhe efikasiteti i kontrolleve, me normën e zbulimit të punës së padeklaruar që ka arritur në 27%, duke konfirmuar se inspektimet po fokusohen gjithnjë e më shumë aty ku informaliteti është më i lartë.