Një 48 vjeçar ka mbetur i vdekur pas një sherri për motive banale në qytetin e Kavajës. Ngjarja ka ndodhur pasditen e së shtunës në lagjen numër 3 të qytetit, ku viktimë ka mbetur shtetasi Skerdilajd Isufi, njohur edhe me emrin Skënder Vrapi. Policia ka identifikuar si autor të dyshuar të krimit 48 vjeçarin, Landi Puja. Ngjarja ka ndodhur para banesës së këtij të fundit. Hetimet paraprake tregojnë se viktima ka shkuar për të vizituar xhaxhain e tij, që e ka banesën pranë autorit të krimit dhe e ka parkuar makinën para derës së këtij të fundit. Landi Puja ka dalë dhe të dy ata kanë nisur të debatojnë. Më pas autori dyshohet se e ka ndjekur dhe disa metra më tutje e ka qëlluar për vdekje me thikë. Si autori, ashtu edhe viktima dyshohet se janë persona me precedentë të mëparshëm penalë.