Janë zbardhur detaje nga dëshmia e Shefit të Komisariatit të Sarandës, Gëzim Bashllari, i arrestuar në kuadër të një aksioni për ndërtimet pa leje në Sarandë dhe Ksamil. Sipas burimeve, para hetuesve të AMP-së, Bashllari është shprehur se gjatë kësaj jave ka qenë i angazhuar me hetimin e një vrasjeje në Sarandë dhe për këtë arsye nuk ka pasur kohë të merret me rastet e ndërtimeve të paligjshme. Aksioni u zhvillua nga Agjencia e Mbikëqyrjes Policore dhe Policia e Shtetit, pas dyshimeve për favorizim të ndërtimeve pa leje në prag të sezonit turistik. Përveç Bashllarit, u ndaluan edhe nënkomisari Andi Duro, nënkomisari Ajdin Ismailaj dhe inspektori Robert Çullaj, ndërsa në kërkim është shpallur shefi i krimeve, Blerim Tafciu. Ndaj efektivëve rëndojnë dyshime për “Shpërdorim detyre”, “Kryerje të veprimeve arbitrare” dhe “Mosmarrje të masave për të ndërprerë gjendjen e paligjshme”. Sipas hetimeve paraprake, ata dyshohet se kanë lejuar dhe favorizuar ndërtime pa leje, duke mos ndërhyrë për ndalimin e tyre dhe duke kryer veprime në kundërshtim me ligjin.