Në gjeografinë e sulmeve hakmarrëse të Iranit ndaj SHBA dhe Izraelit mungojnë dy vende, ku amerikanët kanë një bazë të madhe ushtarake dhe izraelitët një komunitet të zgjeruar spiunësh. Turqia dhe Azerbajxhani nuk janë goditur nga raketat dhe dronët e Teheranit, pavarësisht se në Turqi ndodhet baza më e madhe ajrore amerikane në Europë, ajo e Incirlikut dhe Azerbajxhani gëzon një bashkëpunim të thelluar me Izraelin në fushën ushtarake dhe të sigurisë. Ekspertët japin disa arsye se përse Irani është stepur nga ideja për të sulmuar këto dy vende. Në rastin e Turqisë, vend anëtar i NATO-s, një sulm i tillë do të aktivizonte artikullin pesë të aleancës, duke ngjeshur radhët e vendeve Teherani do të kishte kundër. Përveç kësaj, Turqia gëzon një forcë ajrore të konsiderueshme që u testua me sukses gjatë operacioneve në Siri. Azerbajxhani është shmangur për arsye të tjera. Një sulm ndaj Bakut mund të ngjallë trazira brenda vetë Iranit për shkak të komunitetit azer prej 15 deri në 20 milionë banorësh që jetojnë brenda kufijve të Iranit.