Kreu i grupit parlamentar të Partisë Demokratike, Gazment Bardhi, ka akuzuar kryeministrin Edi Rama se po hesht prej dy ditësh për audiopërgjimin e nxjerrë nga ish-zv.kryeministri Ahmetaj ku biznesmeni Ron Yeffet flet për një plan që lidhet me trafikun dhe tregtinë e armëve. ‘Në audiopërgjim, Ron Yeffet diskuton planin për sjelljen e armëve nga Afrika, nga zona në konflikt, për t’u paketuar në Shqipëri e për t’u dërguar nëpër botë, por Edi Rama hesht. Ai hesht edhe pasi është dëgjuar qartë si kristali plani i mikut të tij për të mashtruar Ambasadën Amerikane.’ Bardhi e lidh Yeffet me qeverinë shqiptare, duke pretenduar se ai është bërë ortak me kompaninë shtetërore KAYO dhe se kompania e tij ka përfituar 26 milionë euro nga paratë publike në vetëm tetë muaj. ‘Nëse Jefet s’ka autorizim shtetëror për të bërë punët e këqija të qeverisë në afera armësh, pse ai vazhdon të ketë akoma kontratë që e rrit dhe Edi Rama nuk kërkon anulimin e saj të menjëhershëm?’