Kongresi Kombëtar i Partisë Socialiste solli një riorganizim të konsiderueshëm në strukturat drejtuese, me emra dhe funksione të reja që i shtohen forcës së majtë dhe të tjerë që u shkarkuan me miratimin e Kongresit. Ministrat dhe deputetët socialistë që prej orës 9:30 të kësaj të shtune, u ndanë në pesë forume të ndryshme duke filluar nga bujqësia, politika e jashtme, energjia, shëndetësia si dhe rinia. Më pas 1007 delegatë të partisë hynë në Pallatin e Kongreseve, ku u zhvilluan për disa orë punimet dhe votimet e organit më të lartë të Partisë Socialiste. Punimet e kongresit u çelën me fjalimet e sekretarit të përgjithshëm, Damian Gjiknut, kryetari i grupit parlamentar, Taulant Balla dhe dy anëtarët e kryesisë, Elisa Spiropali dhe Ditmir Bushati.