Kryeministri Edi Rama kaloi në sitë punët në parti dhe qeveri gjatë mbledhjes ‘retreat’ që u mbajt në 7 dhe 8 mars në pallatin e brigadave. Drejtuesit politikë të qarqeve dorëzuan propozimet e tyre me disa figura që i shohin me potencial për të përfaqësuar qytetarët në kuvend, por edhe për të maksimalizuar votat e socialistëve. Propozimet do shqyrtohen nga kryesia e partisë deri më 12 mars, moment kur të gjitha palët politike duhet të dorëzojnë listat e kandidatëve në Komisionin Qëndror të Zgjedhjeve. ‘Senatorët’ e Partisë Socialiste pritet të qëndrojnë në listë të hapur, ku duhet të punojnë maksimalisht për të fituar votat preferenciale. Në listë të sigurt parashikohet të jenë ministrat që krahas punëve në qeveri, janë angazhuar edhe në drejtimin e fushatës në disa njësi administrative në kryeqytet, e po ashtu edhe sekretari i përgjithshëm, Blendi Klosi njëherësh drejtues politik i qarkut të Dibrës së bashku me udhëheqësin e fushatës së socialistëve në diasporë. Vetë kryetari i Partisë Socialiste parashikohet të kandidojë në qarkun e Tiranës. Katër kryebashkiakët Ervin Demo, Majlinda Bufi, Tërmet Peçi dhe Agron Malaj kanë shprehur interesin për të kandiduar për deputet. Nisur nga ndikimi që kanë në zonat që përfaqësojnë, kjo do të sillte maksimalizim të votës së partisë në këto zona, por do të çonte katër bashki në zgjedhje të pjesshme lokale. Ndaj mbetet në gjykimin e kryesisë së kësaj force politike, nëse do të jetë e gatshme t’i përfshijë këto katër figura në lista. Pas proceseve të testimeve, një sërë figurash në listën e Partisë Socialiste, do të vijnë nga platforma ‘Deputeti që Duam’, kjo për të rifreskuar skuadrën e përfaqësimit në kuvend. Një pjesë e tyre janë angazhuar ndër vite në administratë apo edhe në strukturat partiake. Gjatë këtyre dy ditëve, socialistët caktuar edhe mesazhin politik që do i përçojnë elektoratit në takimet elektorale gjatë ditëve të fushatës.