“Opozitë të shitur” e konsiderojnë protestuesit Partinë Demokratike dhe më këto thirrje i pritën përfaqësuesit e saj në Kuvend. Pak minuta para fillimit të punimeve parlamentare, demokratët dolën në një komunikatë ku njoftonin bojkotimin e seancës plenare. “Konstatojmë se godina e Parlamentit është rrethuar me qindra punonjës Policie për të penguar qytetarët të protestojnë. Nëse Parlamenti zhvillon punimet nën rrethimin e Policisë së Shtetit, vetëm me qëllim të shuarjes së zërit të qytetarëve, atëherë ai humbet misionin e tij të përfaqësimit të qytetarëve.”- argumentonin demokratët, duke shtuar se edhe mospërfshirja e kërkesave të protestuesve për shfuqizimin e disa ligjeve, në agjendën e kuvendit është bërë shkak që Partia Demokratike të bojktojë Kuvendin.