Policia ka arrestuar 466 persona në qendër të Londrës gjatë një proteste kundër vendimit të qeverisë britanike për të ndaluar grupin aktivist pro-palestinez të ‘Palestine Action’ sipas ligjeve antiterrorizëm. "Deri në orën 21:00, 466 persona u arrestuan për shfaqjen e mbështetjes për ‘Palestine Action’", shkroi Policia Metropolitane në X. Tetë arrestime ndërkohë u bënë për vepra të tjera penale, përfshirë pesë për sulme ndaj oficerëve, por policia tha se askush nuk u plagos rëndë. ‘Palestine Action’ është një grup me bazë në Mbretërinë e Bashkuar i cili thotë se synon të prishë operacionet e prodhuesve të armëve që furnizojnë qeverinë izraelite. Muajin e kaluar, ligjvënësit e Mbretërisë së Bashkuar votuan për të ndaluar grupin pasi dy aktivistë të ‘Palestine Action’ hynë me forcë në bazën ajrore më të madhe të Britanisë në Anglinë qendrore në qershor, duke dëmtuar dy avionë ushtarakë. Ndalimi i grupit e bën të paligjshme sipas ligjit britanik të jesh anëtar, ose të ofrosh mbështetje për ‘Palestine Action’ dhe e vendos grupin në të njëjtin nivel me organizatat terroriste si Hamasi, al Kaeda dhe ISIS.