Kreu i PD Sali Berisha gjatë konferencës për shtyp të kësaj të premteje njoftoi datën e protestës së radhës kombëtare, që sipas tij do të jetë një organizim më i fuqishëm. ‘Me datën 8 maj, një ditë e rëndësishme, shqiptarët do të mblidhen në rrugët dhe sheshet e Tiranës në kryengritjen e tyre më të fuqishme paqësore që ka njohur vendi kundër kreut të organizatës kriminale dhe regjimit të tij, qeverisë së tij. Pra, kundër Edi Ramës dhe narkoministrave.’ Kryedemokrati ceku edhe njëherë takimet e bëra nga qeveria në Bruksel, që sipas tij i janë mbajtur të fshehta opozitës dhe opinionit publik, duke cenuar transparencën në procesin e integrimit europian. Berisha po ashtu u shpreh se Rama ka bllokuar drejtësinë me cështjen Balluku, ku sipas tij kreu i qeverisë për të shpëtuar lëkurën e vet i ka thënë ‘plac’ partnerëve ndërkombëtarë të cilët kërkojnë funksionimin e shtetit ligjor duke e deklaruar këtë cështje të mbyllur.