Mijëra qytetarë u grumbulluan në sheshin ‘Skënderbej’ në Prishtinë mbrëmjen e së premtes, për të shfaqur revoltën ndaj vendimit të Gjykatës Speciale të Hagës që dënoi me 81 vite burg në total katër ish krerët e Ushtrisë Çlirimtare të Kosovës. Të pranishëm ishin edhe familjarët e Hashim Thaçit dhe Kadri Veselit. Vendimi i Gjykatës Speciale të Hagës shkoi në kundërshti të plotë me atë çfarë ka dëshmuar historia e popullit shqiptar dhe luftës për liri të Ushtrisë Çlirimtare të Kosovës. Shqiptimi i viteve të burgosjes së çlirimtarëve në emër të popullit të Kosovës, e shtoi edhe më shumë zemëratën e qytetarëve të cilët dolën në shesh me pankartën: “Jo në emrin tim.” Tashmë qytetarët i kanë sytë nga apeli për korrigjimin e kësaj vendimmarrje të gabuar të Hagës. Por, njëkohësisht gjithnjë e më shumë po shfaqet domosdoshmëria e shbërjes së kësaj gjykate. Vite më parë nën presionin edhe të ndërkombëtarëve, kasta politike në Prishtinë votoi në parlament ngritjen e kësaj gjykate duke i dhënë një mbrojtje të veçantë kushtetuese. Shkrirja e saj sot është e vështirë për shkak se do të kërkonte edhe votat e minoritetit serb.