Qytetarët e Selenicës kanë dalë në protestë kundër shkrirjes së bashkisë së tyre, në kuadër të draftit për reformën e re territoriale. Qindra qytetarë, banorë të zonës dhe përfaqësues të komunitetit u mblodhën pranë Monumentit të Drashovicës, duke kundërshtuar çdo vendim që parashikon bashkimin e Selenicës me njësi të tjera vendore. Me pankarta dhe thirrje si “Selenica nuk mbyllet!” dhe “Larg duart nga Selenica!”, protestuesit kërkuan që bashkia të vijojë të funksionojë si njësi më vete. Sipas tyre, shkrirja e Bashkisë së Selenicës do të sillte pasoja për ofrimin e shërbimeve publike, përfaqësimin e banorëve dhe zhvillimin e zonës. Ata theksuan se ruajtja e bashkisë lidhet jo vetëm me administrimin lokal, por edhe me identitetin dhe historinë e komunitetit. Në tubim morën pjesë edhe përfaqësues dhe anëtarë të Partisë Demokratike, të cilët shprehën mbështetjen për kërkesat e banorëve.