Në një shkrim të gjatë që fillon me kujtimet e fëmijërisë së hershme të protestave kundër regjimit diktatorial dhe vijon me nota të tragjedisë shekspiriane të Makbethit, simbolit të dëmeve psikologjike që sjell ambicia për pushtet; ish ministrja socialiste, Elisa Spiropali thotë se tashmë ka ardhur koha për një marrëveshje të re për Shqipërinë. Spiropali: “Protestat e zhurmshme dhe krijuese të këtyre ditëve, krahasuar me protestën e heshtur të atëhershme, nuk janë lapsus psikologjik, nuk janë déjà vu, nuk janë lajthitje cerebrale. Ç'u bë, nuk mund të ç'bëhet, thotë Lady Makbeth në skenën somnambul tek ecën në gjumë me qiri në dorë. Është kollaj protestave të sotme t'u sillesh rrotull me llafe boshe, me konspiracione dhe hamëndje shterpe: Cilin krim kreu Lady Makbethi, pse i iku gjumi, pse ngrihej natën somnambul, pse mbante qiri në dorë? Tani që të gjithë Makbethat vrasës dhe Hamletat dyshues kanë dalë sheshit dhe kanë hyrë në lojë, tani që vrasja është bërë, gjaku është derdhur, ndërgjegjet janë tronditur, gjumi është prishur, çfarë duhet bërë diçka tjetër? Jo diçka dosido. Diçka shekspiriane. Diçka e qëndrueshme. Diçka që po u bë, nuk zhbëhet. Për fat, kjo pyetje ka përgjigje. Çka duhet bërë sot është një marrëveshje e re për Shqipërinë.” Mes rreshtash, Spiropali tregon edhe sesi duhet të jetë dhe çfarë duhet të prodhojë marrëveshja e re për Shqipërinë.