Protesta e shqiptarëve në Londër kundër Sekretares Suella Braverman, shkaktoi zemërim në Angli, për faktin se një flamur shqiptar mbuloi statujën e Sir Winston Churchill. Së fundmi, mediat angleze kanë kaluar në sitë këtë protest, duke pretenduar se dy organizatorët kryesorë të saj janë dy vëllezër nga Shkodra, që për ironi janë me precedentë. Bëhet fjalë për Taulant dhe Enkelejd Omi, që udhëhoqën një protestë prej 1500 vetësh jashtë Parlamentit muajin e kaluar, pasi Sekretarja e Brendshme Suella Braverman tha se Britania u përball me një "pushtim" të emigrantëve të paligjshëm, madje duke shkuar deri aty sa u shpreh që kriminelë shqiptarë po kërkojnë azil në Angli. Po këta dy vëllezër udhëhoqën gjithashtu festimet e ditës së pavarësisë shqiptare, me një kolonë makinash luksoze që shkaktoi bllokim rrugësh në Londër. Muajin e kaluar Enkeleid Omi, 49 vjeç, u tha gazetarëve: “Ne menduam se ishte e dobishme për komunitetin tonë të tregonim se nuk jemi siç quhemi. Ne nuk jemi kriminelë. Ne nuk jemi pushtues”.