Partia Demokratike përshëndeti protestën paqësore të bashkëluftëtarëve të ish-udhëheqësve të UÇK-së dhe të Kosovës që u mbajt në Tiranë këtë të premte. Përmes një deklarate për shtyp, selia blu duke vlerësuar luftën çlirimtare të UÇK si më dinjitozen dhe më të ndriturën që nga koha e Skënderbeut, i ka bërë thirrje gjykatës së Hagës që të lirojë sa më shpejt katër ish-udhëehqsit e vendosur nën akuzë. “Nuk është publikuar asnjë fakt apo provë që të provojë urdhra direkt të ish-udhëheqësve të UÇK-së për krime konkrete. Ky proces dëshmoi përfundimisht se ai është i bazuar në dosje të fabrikuara nga Beogradi dhe armiq të tjerë të kombit shqiptar që kërkojnë të barazojnë agresorin, pushtuesin me çlirimtarin. Për të gjitha këto, Partia Demokratike i bën thirrje trupit gjykues të Gjykatës Speciale të Kosovës në Hagë të shpallë sa më parë pafajësinë e ish-udhëheqësve politikë të UÇK-së dhe të Kosovës, në respekt të plotë të parimeve ndërkombëtare të drejtësisë.”, nënvizohet në deklaratën e shpërndarë për shtyp nga ana e selisë blu që sqaron më tej se në radhët e opozitës nuk ka pasur asnjë urdhër për bojkotim të këtij tubimi.