Policia holandeze përdori gaz lotsjellës dhe topa uji për të shpërndarë protestuesit e dhunshëm anti-emigracion në Hagë të shtunën. Tridhjetë persona u arrestuan dhe dy oficerë u plagosën ndërsa grupe të mëdha njerëzish u përleshën me policinë. Ndërsa nuk munguan gurët e shishet në drejtim të efektivëve. Rreth 1,500 persona bllokuan një autostradë që kalonte nëpër qytet, ndërsa një makinë policie u dogj, raportoi agjencia holandeze e lajmeve ANP, duke cituar të dhënat e policisë. Kryeministri Dick Schoof dënoi "imazhet tronditëse dhe të çuditshme të dhunës së paturpshme", duke thënë se ishin "krejtësisht të papranueshme". Lideri i krahut të djathtë, Geert Ëilders, i cili fitoi zgjedhjet e mëparshme në Holandë dhe ka ruajtur epërsinë në sondazhet e opinionit publik përpara votimit të 29 tetorit, u ftua të fliste në demonstratë, por nuk mori pjesë. Në vend të kësaj, ai e dënoi gjithashtu dhunën kundër policisë si "absolutisht të papranueshme", duke thënë se ishte vepër e "idiotëve". Protesta u organizua nga një aktivist i krahut të djathtë, i cili kërkonte politika më të rrepta për migracionin dhe masa të rrepta ndaj azilkërkuesve. Dhuna shpërtheu kur grupe të mëdha protestuesish, shumë prej të cilëve valëvitnin flamuj holandezë dhe flamuj të lidhur me grupet e ekstremit të djathtë, u përballën me forcat e sigurisë. Protestuesit thyen gjithashtu dritaret e selisë së partisë së qendrës së majtë D66, e cila shihet nga shumë në të djathtën ekstreme si një parti që i shërben një elite progresive.