Kryeministri izraelit Benjamin Netanjahu ka propozuar Presidentin amerikan Donald Trump për Çmimin Nobel për Paqen. Në fillim të një darke në Shtëpinë e Bardhë të hënën, ai vlerësoi para gazetarëve "përpjekjet për paqe dhe siguri, të cilat Trump po udhëheq në shumë vende, veçanërisht në Lindjen e Mesme". "Ndërsa ne flasim ai po krijon paqe, në një rajon pas tjetrit", tha Netanyahu. Ai më pas i dorëzoi Trumpit një letër që ai tha se ia kishte dërguar Komitetit të Nobelit për të nominuar presidentin e SHBA-së për Çmimin e Paqes. "E meritoni dhe duhet ta merrni". "Uau", tha më pas Trump me habi. "Është shumë domethënëse kjo që vjen nga ana juaj", shtoi ai. Trump tha, se propozimi ishte diçka e re për të. Presidenti amerikan e ka përshkruar prej kohësh veten si paqebërës dhe e ka bërë të qartë dëshirën e tij për Çmimin Nobel. Trump dhe Netanjahu kanë biseduar gjithashtu për zhvendosjen e mundshme të palestinezëve nga Rripi i Gazës. Kryeministri izraelit tha, se Izraeli po punon me SHBA-në për të gjetur vende që ofrojnë një të ardhme më të mirë për palestinezët. "Nëse njerëzit duan të qëndrojnë, mund të qëndrojnë. Por nëse duan të largohen, duhet të jenë në gjendje të largohen", tha ai. I pyetur për planet për zhvendosjen e palestinezëve, Trump tha se kishte bashkëpunim të mirë me vendet fqinje të Izraelit. Lidhur me statusin aktual të bisedimeve jo të drejtpërdrejta mes Izraelit dhe Hamasit për arritjen e armëpushimit dhe lirimin e pengjeve, Përfaqësuesi Special i SHBA-së për Lindjen e Mesme, Steve Ëitkoff, i cili ishte i pranishëm në darkën e Trump dhe Netanjahut, tha se ekziston mundësia për të arritur një marrëveshje shpejt. Sipas Shtëpisë së Bardhë, Ëitkoff do të udhëtojë këtë javë në kryeqytetin e Katarit, Doha, për të marrë pjesë në bisedime. Trump njoftoi gjithashtu se ka bisedime të administratës së tij me Iranin. "Ne kemi planifikuar bisedime me Iranin dhe ata e duan këtë," tha Trump. "Ata duan të flasin." Sipas të dërguarit të posaçëm të SHBA-së, Ëitkoff, takimi midis përfaqësuesve të SHBA-së dhe Iranit mund të zhvillohet javën e ardhshme. Trump sugjeroi heqjen e sanksioneve kundër Iranit në një datë të mëvonshme.