Shtatë skema sesi pastrohen paratë në Shqipëri janë zbardhur nga Agjencia e Inteligjencës Financiare, ku evidentohet roli kyç që duhet të luajnë si sinjalizues bankat, noterët, zyrat e këmbimit valutor apo edhe shoqëritë e ndërtimit. Një shembull është investimi në pasuri të paluajtshme nga një ish zyrtar shtetëror i dënuar për korrupsion dhe shpërdorim detyre, i cili gjatë vitit 2024 ka nënshkruar kontrata sipërmarrje për prenotim pasurish të paluajtshme të llojit apartament në vlerën 60 mijë euro, poste parkimi 35 mijë euro dhe njësi në vlerën 60 mijë euro. Nga të dhënat në llogarinë e tij bankare rezulton se fondet për blerjen e pasurive të palujtshme janë akumuluar si depozitime nga persona të tretë në vlerën 140 mijë euro, në formën e dhurimit, dhënie hua, likujdim borxhi edhe pse ka lidhje të paqarta mes palëve. Nisur nga çmimi i ulët i blerjes së pasurive, nën vlerën e tregut dhe paratë e dërguara nga persona të tretë, ky rast është dërguar për investigim në organet e zbatimit të ligjit.