Prokuroria e Vlorës ka sekuestruar rreth 4 milionë euro pasuri të cilat dyshohet se janë krijuar përmes veprimtarive të paligjshme të mbuluara me dokumente të falsifikuara. Pasuritë i përkasin shtetasit Fatos Pelivan Canaj dhe familjarëve të tij, të cilët janë nën hetim për veprat penale “Falsifikimi i dokumenteve” dhe “Pastrimi i produkteve të veprës penale ose veprimtarisë kriminale”. Sipas njoftimit zyrtar, masa është marrë me kërkesë të Prokurorisë pas hetimeve të kryera që nisën në vitin 2023. Pas hetimeve janë bllokuar një sërë pasurish të luajtshme dhe të paluajtshme të regjistruara në emër të Canajt dhe familjarëve të tij. Prokuroria thotë se vlera e këtyre pasurive, që përfshijnë prona, apartamente dhe biznese kap shifrën e rreth 4 milionë eurove. Midis tyre figurojnë një truall 1600 m² në Vlorë, disa njësi shërbimi dhe godina biznesi në emër të Fatos Canajt, si dhe apartamente të regjistruara në emër të shoqërisë “F” sh.p.k. Lista përfshin gjithashtu bodrume me sipërfaqe të madhe dhe ndërtesa, për të cilat ka dyshime se janë krijuar nga aktiviteti i paligjshëm.