Pas kërkesës së marrë vetëm një ditë më parë nga kreu i shtetit Ilir Meta për verfikimin e emrave të ministrave të propozuar nga kryeministri Edi Rama, Prokuroria e Përgjithshme ka kthyer përgjigje këtë pasdite. Sipas burimeve mësohet se prokuria e Përgjithsme përmes një shkrese zyrtare ka njoftuar kreun e shtetit lidhur me gjendjen penale të ministrave të kabinetit qeveritar. “Asnjë nga emrat e qeverisë nuk është proceduar. Asnjë nga emrat e emëruar s’ka probleme”, thuhet në përgjigjen e Prokurorisë ndaj kreut të shtetit. Meta kërkoi të dinte nga spak nëse për ndonjërin prej tyre ka procese hetimore apo penale që janë nisur apo mund të jenë në fazë vlerësimi. “Nëse për këta shtetas disponon informacione të kësaj natyre, pa cenuar sekretin hetimor kërkojmë që të informohemi mbi gjendjen e procedimit dhe statusin e secilit prej shtetasve të mësipërm. Lutemi, që ky informacion të na përcillet brenda një kohe sa më të shpejtë, pasi siç ju e dini sipas nenit 98 të Kushtetutës, Presidenti i Republikës do të duhet të shprehet mbi këto emra brenda 7 ditëve nga administrimi i propozimit prej kryeministrit”, thuhet në shkresën e presidentit Meta. Ndërkohë gjatë fundjjavës kreu i shtetit ka dekretuar kryeministrin Edi Ramën si Kryeministrin e Shqipërisë.