Prokuroria e Durrësit po merr në pyetje Muxhahedinët në kuadër të finalizimit të procesit hetimor për kontrollet në kampin në Manëz të Durrësit. Prej dy ditësh organi i akuzës ka thirrur anëtarë të opozitës iraniane të strehuar në Shqipëri. Më 21 qershor prokurorët morrën në pyetje pesë persona teksa këtë të enjte drejt prokurorisë u drejtuar dy muxhahedinë. Gjatë ditëve në vijim do të vazhdojë marrja e dëshmive, ku në total do të janë rreth 10 muxhahedin që do të japin deklaratat për atë çfarë ndodhi në kamp gjatë kontrolleve policore me urdhër të SPAK dhe vendim të Gjykatës së Posaçme Antikorrupsion. Burime bëjnë me dije se bëhet fjalë për persona kryesisht në rolin e liderëve të kampit. Nga ana tjetër, burime nga organi i akuzës bëjnë me dije se nuk ka kamera sigurie në vendet ku muxhahedinet pretendojnë se policia ka ushtruar dhunë ndaj tyre. Qindra forca të policisë ndërhynë për të ushtruar kontrolle në kampin Ashraf 3 në Manzë të Durrësit, ku qëndrojnë prej vitit 2018 muxhahedinët, të njohur edhe si opozita iraniane. Ministria e Brendshme pretendon se ata kanë shkelur marrëveshjen fillestare për t’u strehuar në Shqipëri për qëllime humanitare.