Përfaqësitë diplomatike amerikane dhe europiane në Tiranë reaguan pas dëshmisë së të penduarit të drejtësisë Artan Tafani, ku zbulohej se grupi i Laert Haxhiut donte të eliminonte dy prokurore. Në deklaratën e ambasadës amerikane ngrihet shqetësimi për kërcënimet që iu kanosen magjistratëve teksa ritheksohet mbështetja e plotë të SHBA-ve në luftën kundër krimit të organizuar. “Një sistem drejtësie që funksionon pa frikë dhe kërcënime është kërkesë legjitime e popullit shqiptar dhe Shtetet e Bashkuara janë thellësisht të shqetësuara për kërcënimet për dhunë ndaj zyrtarëve të zbatimit të ligjit që po punojnë për ta bërë Shqipërinë të sigurt, të begatë dhe më demokratike. Hetuesit, prokurorët dhe gjyqtarët duhet të jenë në gjendje të kryejnë detyrat e tyre pa kërcenime apo kanosje. Shtetet e Bashkuara ritheksojnë mbështetjen e tyre të palëkundur për zyrtarët e zbatimit të ligjit në Shqipëri, të cilët po luftojnë korrupsionin dhe krimin e organizuar me guxim, si dhe janë gati të mbështesin përpjekjet e tyre.” – thuhet në deklaratën e ambasadës së Shteteve të Bashkuara të Amerikës.