Një zëdhënës i ambasadës amerikane në Prishtinë, i tha Zërit të Amerikës se Shtetet e Bashkuara janë duke vazhduar diskutimet me qeverinë e Kosovës rreth lidhjes me një gazjsellës ekzistues me Maqedoninë e Veriut, një projekt i propozuar nga Korporata Sfidat e Mijëvjeçarit. Ai i bëri këto komente pas debateve që u hapën në Prishtinë rreth kësaj çështjeje pas deklaratës së ministres së Ekonomisë Artane Rizvanolli se qeveria e Kosovës është në bashkëpunim të vazhdueshëm me Korporatën e Sfidave të Mijëvjeçarit për çështjen e infrastrukturës së gazit. Ajo tha se ka filluar puna për studimin e fizibilitet për ndërtimin e infrastrukturës së gazit me një fond prej 200 milionë dollarësh. Ministrja Rizvanolli tha se kostoja e investimit si dhe kapitali janë disa nga dilemat e qeverisë.