Gjatë fushatës, socialistët premtuan që 50 mijë famije do të kenë mundësinë e një çelësi për hapur derën e shtëpisë brenda vitit 2030. Kjo, sipas kryeministrit Edi Rama do të realizohet përmes Programit të ri Kombëtar të Strehimit që përfshin banesa sociale me qira, banesa me kosto të ulët, përmirësimin i banesave ekzistuese për grupet vulnerabël dhe një sërë aspektesh të tjera. “Banesat sociale me qera do të parashikojnë ndërtim të ri, blerje të drejtpërdrejtë nga tregu, përshtatje të objekteve shtetërore ose të objekteve të konfiskuara. Dhe këtu, dua të përsëris, që kemi konfiskuar jo pak objekte dhe do të konfiskojmë çdo objekt që do të shkelë rregullat e paracaktuara në ligj për lejet e ndërtimit dhe patjetër dhe bonusin e qerasë, por po ashtu partneritetin publik-privat. Pra, do të përdorim të gjithë instrumentat për të garantuar një ofertë shumë më të gjerë nga ana e shtetit për ata që duhet dhe që do të mund të marrin banesë sociale me qera. Pastaj vijmë tek banesa me kosto të ulët, që është një tjetër program i cili lidhet me subvencionin nga ana e shtetit të kredisë duke pasur parasysh që banesa e kredituar të hyjë në kategorinë e banesave me kosto të ulët dhe për këtë ka një kategorizim të mirëpërcaktuar, me kritere të mirëpërcaktuara.”