Një 35-vjeçar është arrestuar nga policia e Tiranës në kuadër të operacionit "Tempulli 2" pasi ishte shpallur në kërkim për veprën penale "Prodhimi dhe shitja e narkotikëve". Arrestimi është kryer në rrugën "Gjergj Legisi", në Laprakë, ku shtetasi me inicialet R.D. është lokalizuar dhe kapur. Gjatë kontrollit të kryer në banesën e 35-vjeçarit, janë gjetur disa doza me heroinë, të cilat janë sekuestruar si provë materiale. Më herët në kuadër të Operacionit Tempulli 2, policia e Tiranës ka sekuestruar sasi të konsiderueshme narkotikësh, duke përfshirë 14 kg kanabis, 5.3 kg kokainë, 170 gram heroinë, si dhe 11 peshore elektronike, 4 armë zjarri pistoleta dhe 1 armë zjarri automatik. Po ashtu, janë gjetur 70 celularë, 11 automjete, 2 186 000 lekë, 11 610 euro, dhe 630 paund. Ky operacion ka çuar në ndalimin e 71 shtetasve të tjerë. Ndërkohë që policia bën të ditur se vijon puna në kuadër të këtij megaoperacioni, për kapjen e personave të shpallur në kërkim.