Rritja e pagave për nëpunësit e sektorit shtetëror, ze peshën më të madhe në rritjen ekonomike të vendit gjatë tremujorit të tretë të këtij viti. Sipas të dhënave të Institutit të Statistikave, produkti i brendshëm bruto vlerësohet me rritje 3.75 për qind krahasuar me po të njëjtën periudhë të një viti më parë. Krahas administratës publike, shtylla e dytë e rritjes ekonomike janë pasuritë e paluajtshme, ndërkohë që bujqësia ka ndjekur trajektore rënëse. Shifrat e INSTAT, tregojnë se gjatë tremujorit të tretë të këtij viti, administrata publike, arsimi dhe shëndetësia njohën një rritje prej 15 për qind krahasuar me po të njëjtën periudhë të një viti më parë. Ndërkohë aktivitetet ekonomike në fushën e pasurive të paluajtshme janë rritur me rreth 11 për qind. Bujqësia ka rënë me 1.73 për qind, ndërkohë që taksat neto mbi produktet u rritën me rreth 5.4 për qind.