Kremlini tha të enjten se Rusia nuk mendonte se bisedimet e paqes për Ukrainën kanë ngecur pavarësisht deklaratave të Donald Trump në lidhje me Presidentin rus Vladimir Putin dhe rifillimin e dërgimit të disa armëve nga Uashingtoni në Ukrainë. Trump tha të martën se nuk ishte i kënaqur me Putinin dhe akuzoi shefin e Kremlinit se po thoshte "shumë budallallëqe". Shtetet e Bashkuara po dërgojnë ndërkohë predha artilerie dhe bateri raketash në Ukrainë, thanë dy zyrtarë amerikanë për agjencinë e lajmeve Reuters. I pyetur nëse procesi i paqes për Ukrainën kishte ngecur për shkak të komenteve të Trump dhe rifillimit të dërgesave të armëve nga SHBA-ja, zëdhënësi i Kremlinit Dmitry Peskov u tha gazetarëve: "Jo, nuk mendoj kështu. Nuk mund ta thuash këtë." Rusia, tha Peskov, po pret një sinjal nga Kievi nëse do të bashkohej apo jo me një raund të tretë bisedimesh, i cili nisi në maj në Stamboll. "Ne kemi thënë vazhdimisht se do të preferonim që të arrinim qëllimet tona përmes mjeteve paqësore politike dhe diplomatike, por për sa kohë që kjo nuk ndodh, operacioni ushtarak special vazhdon dhe realiteti në terren ndryshon çdo ditë", tha Peskov. Putin dërgoi me dhjetëra e mijëra trupa në Ukrainë në shkurt 2022, pas tetë vitesh luftime në Ukrainën lindore mes separatistëve të mbështetur nga Rusia dhe trupave ukrainase. Shtetet e Bashkuara thonë se mbi 1.2 milion njerëz janë vrarë dhe plagosur në luftë që nga viti 2022. Trump, i cili thotë se dëshiron të mbahet mend si paqebërës, ka bërë thirrje të përsëritura për t'i dhënë fund "gjakderdhjes" në Ukrainë. Por Putin, forcat e të cilit kontrollojnë një të pestën e Ukrainës dhe po përparojnë, ka qëndruar i vendosur në kushtet e tij për t'i dhënë fund luftës, pavarësisht presionit publik dhe privat nga Trump dhe paralajmërimeve të përsëritura nga fuqitë evropiane. Në qershor 2024, Putin tha se Ukraina duhet zyrtarisht të heqë dorë nga ambiciet e saj për anëtarëim në NATO dhe të tërheqë trupat e saj nga territori i katër rajoneve ukrainase që Rusia i pretendon tani si të vetat.