Numri i protestuesve të proceduar nga Policia e Shtetit që prej nisjes së tubimeve ka tejkaluar 80. Policia e Tiranës njoftoi të premten se ka proceduar 27 qytetarë për marshimin në ditën e 19-të të tubimeve. Në njoftimin publik, policia deklaron se janë identifikuar dhe proceduar penalisht 27 shtetas, të dyshuar të përfshirë gjatë tubimit, në veprime që cenojnë rendin dhe sigurinë publike. Këta shtetas, thotë policia, kanë shkaktuar pengim të qarkullimit të mjeteve të transportit, si dhe shqetësim për rendin dhe qetësinë publike, duke orientuar qytetarët pjesëmarrës në tubim, për të lëvizur në akse të shumta të kryeqytetit, në tejkalim të orarit dhe perimetrit të lëvizjes të njoftuar zyrtarisht. Gjithashtu, është sekuestruar dhe 1 automjet. Policia njofton se po vijon punën për identifikimin dhe procedimin e shtetasve të tjerë, përgjegjës, sipas saj, për veprime të kundërligjshme gjatë tubimit.