Një nga luftërat më të rrezikshme të viteve të fundit, është ajo kibernetike, pre e të cilës ka rënë edhe vendi ynë jo rrallë herë. Në këtë kuadër, edhe vendet e Bashkimit Europian I kanë rritur kontrollet duke treguar kujdes të shtuar. Policia spanjolle ka arrestuar tre hakerë prorusë, të dyshuar për kryerje të sulmeve kibernetike me qëllime terroriste, kundër Spanjës dhe shteteve tjera të NATO-s. Sipas medieve ndërkombëtare, të dyshuarit janë ndaluar për pjesëmarrje nëpër sulme kundër institucioneve publike dhe sektorëve strategjikë, kanë thënë autoritetet. Sulmet dyshohet se janë kryer kundër uebfaqeve të organizatave publike dhe private, në sektorë qeveritarë, në infrastrukturë kritike dhe shërbime thelbësore në shtetet që mbështesin Ukrainën, teksa e lufton pushtimin rus, sipas njoftimit. “Këto sulme kompjuterike janë organizuar nga grup i hakerëve NoName057(16), i cili ka nisur punën pas nisjes së pushtimit rus në Ukrainë dhe është më aktivi”, ka thënë policia. Arrestimet janë kryer nëpër rajone të ndryshme të Spanjës. Pamjet: AFP